सोमनपल्लीसह १० गावातील नागरिकांचे महामार्गावर झोपड्या बांधून वास्तव्य

पूर्णसत्य न्यूज नेटवर्क गडचिरोली दि २५ जुलै

गडचिरोली जिल्ह्यात ८ जुलै पासून संततधार पाऊस सुरु झाला. त्यामुळे दक्षिण गडचिरोलीत पूरपरिस्थिती निर्माण झाली. सिरोंचा तालुक्यात तब्बल आठवडाभर पडणारा पाऊस, तर दुसरीकडे गोदावरी आणि इंद्रावती नद्यांची पाणी पातळीत वाढ होऊन छत्तीसगड सीमेकडील १५ ते २० गावांमध्ये पाणी शिरले होते. पूर ओसरल्यानंतर गावात आणि घरात जाणेही शक्य नसल्याने सोमनपल्ली, कोत्तापल्ली, दुपापल्ली यासारख्या काही गावांतील लोकांनी पुराचे पाणी पोहोचू न शकणाऱ्या राष्ट्रीय महामार्ग क्रमांक ६३ वर तात्पुरत्या झोपड्या उभारून त्यात वास्तव्य सुरू केले असून आम्हाला दुसरीकडे जागा देऊन पुनर्वसन करा, अशी मागणी गावकऱ्यांनी केली आहे.

दक्षिण गडचिरोलीत पुराने थैमान घातले होते. एकीकडे वरून जिकडे-तिकडे अतिवृष्टी आणि धरणांमधून पाण्याचा विसर्ग सुरू झाल्याने गोदावरीचे पात्र फुगले आणि अवघ्या दोन दिवसांत मेडीगड्डा प्रकल्पाचे सर्व ८५ गेट उघडून पूर्ण क्षमतेने विसर्ग सुरू करण्यात आला. तर दुसरीकडे गोदावरीला जाऊन मिळणाच्या इंद्रावती नदीचे पाणी गोदावरीत सामावणे कठीण झाल्याने ते पाणी नदीपात्र सोडून परिसरातील गावात आणि शेतात शिरले. या दोन नद्यांच्या पुरात सिरोंचा तालुक्यातील सोमनपल्ली आणि त्या परिसरात असलेल्या नवीन सोमनूर, जुने सोमनूर, पिंडलाया, शुकरअली, टेकडाताला, गुमलकोंडा, मुत्तापूर, चितरखेला, कोत्तापल्ली, अंकिसा ही गावे सापडली. प्रशासनाने येथील नागरिकांना सुरक्षित स्थळी हलवून पूर ओसरेपर्यंत त्यांची सर्व व्यवस्था केली. मात्र, घरातील अन्नधान्य, इतर वस्तू पुरामध्ये वाहून गेले. त्यामुळे गावकऱ्यांनी पूर ओसरल्यानंतरही गावात न जाता जीव मुठीत घेऊन पुराचे पाणी पोहोचू न शकणाऱ्या राष्ट्रीय महामार्ग क्रमांक ६३ वर झोपड्या उभारून राहत आहेत.

मेडीगड्डा प्रकल्पामुळे या भागात दरवर्षी अशा पद्धतीने पुराचा फटका बसण्याची शक्यता नाकारता येत नाही. त्यामुळे आम्हाला दुसरीकडे जागा देऊन पुनर्वसन करा, अशी अपेक्षा सोमनपल्लीतील खरडून गेली आहे. या गावकऱ्यांना प्रशासनाच्या वतीने अन्नधान्य व इतर साहित्याचे वाटप केले. या भागाला काँग्रेस नेते आमदार विजय वडेट्टीवार यांनी भेट देऊन किराणा सामानाच्या किटचे वाटप केले. गावकऱ्यांच्या पुनर्वसनाचा विषय शासनाकडे लावून धरणार असल्याचा दिलासा त्यांनी गावकऱ्यांना दिला असला तरी हा विषय एवढ्या लवकर मार्गी लागेल का, हाच खरा प्रश्न आहे.