युआयटी अडपल्लीच्या विद्यार्थ्यांची लॉयड्स मेटल्समध्ये इंटर्नशिप

पूर्णसत्य न्यूज नेटवर्क गडचिरोली दि.२९ मे 

गोंडवाना विद्यापीठांतर्गत कार्यरत युनिव्हर्सिटी इन्स्टिट्यूट ऑफ टेक्नॉलॉजी (यूआयटी), अडपल्ली येथील सर्व शाखांतील प्रथम वर्ष व द्वितीय सत्रातील डिप्लोमा अभ्यासक्रमाच्या विद्यार्थ्यांनी लॉयड्स मेटल्स अँड एनर्जी लिमिटेड (एलएमईएल)च्या विविध प्रकल्पांमध्ये उन्हाळी इंटर्नशिप व औद्योगिक प्रशिक्षणास प्रारंभ केला आहे. २० मे  रोजी परीक्षा आटोपल्यानंतर या उन्हाळी प्रशिक्षणाला सुरूवात करण्यात आली.

या उपक्रमांतर्गत १८ वर्षांखालील विद्यार्थ्यांना लॉयड्स अकॅडमिक स्किल सेंटर, बोदली येथे प्रशिक्षणासाठी पाठविण्यात आले आहे. तर १८ वर्षांवरील विद्यार्थ्यांना लॉयड्स मेटल्सच्या कोनसरी व सुरजागड येथील प्रकल्पांमध्ये प्रत्यक्ष औद्योगिक प्रशिक्षणाची संधी उपलब्ध करून देण्यात आली आहे. विशेषतः मायनिंग इंजिनिअरिंग शाखेतील विद्यार्थ्यांना सुरजागड मायनिंग प्रकल्पात नियुक्त करण्यात आले आहे. तेथे त्यांना खाण उद्योगाविषयी प्रत्यक्ष अनुभव व व्यावहारिक ज्ञान मिळत आहे.

इंटर्नशिपदरम्यान विद्यार्थ्यांना आधुनिक तंत्रज्ञान, उत्पादन प्रक्रिया, औद्योगिक सुरक्षा पद्धती आणि कार्यस्थळ व्यवस्थापन यांचे प्रात्यक्षिक प्रशिक्षण दिले जात आहे. अनुभवी अभियंते आणि उद्योग विशेषज्ञांच्या मार्गदर्शनाखाली विद्यार्थी तांत्रिक कौशल्य विकसित करत आहेत. शैक्षणिक ज्ञानासोबतच प्रत्यक्ष औद्योगिक अनुभवही मिळवत आहेत.

विद्यार्थी या प्रशिक्षण कार्यक्रमात उत्साहाने सहभागी होत असून, त्यांना व्यावसायिक औद्योगिक कार्यसंस्कृतीचा अनुभव मिळत आहे. विद्यार्थ्यांच्या निवास व भोजनाची योग्य व्यवस्था करण्यात आली आहे. प्रशिक्षण प्रक्रियेत अधिक समर्पण आणि सहभाग वाढावा यासाठी कंपनीकडून स्टायपेंड देण्याबाबतही विचार सुरू असल्याचे कंपनीच्या वतीने सांगण्यात आले.

हा उपक्रम लॉयड्स मेटल्स अँड एनर्जी लिमिटेडचे व्यवस्थापकीय संचालक बी.प्रभाकरन यांच्या दूरदृष्टीपूर्ण नेतृत्वामुळे शक्य झाला आहे. विद्यार्थ्यांनी केवळ सैद्धांतिक शिक्षणापुरते मर्यादित न राहता व्यावहारिक औद्योगिक अनुभव, तांत्रिक प्राविण्य आणि उपयोजित ज्ञान आत्मसात करावे, यावर त्यांनी सातत्याने भर दिला आहे. गडचिरोली जिल्ह्यातील विद्यार्थ्यांचा सर्वांगीण विकास साधत शिक्षण आणि उद्योग यांच्यात मजबूत दुवा निर्माण करण्यासाठी ते कटिबद्ध आहेत.

हा इंटर्नशिप कार्यक्रम शैक्षणिक अध्ययन आणि औद्योगिक कार्यपद्धती यातील दरी कमी करण्यास महत्त्वपूर्ण ठरणार आहे. विद्यार्थ्यांचा आत्मविश्वास वाढविणे, रोजगारक्षमता मजबूत करणे आणि त्यांना अभियांत्रिकी व तांत्रिक क्षेत्रात यशस्वी करिअरसाठी तयार करणे हा या उपक्रमाचा मुख्य उद्देश आहे. विद्यार्थ्यांनी, पालकांनी आणि प्राध्यापकांनी या उपक्रमाचे स्वागत केले असून, भविष्यातही अशा उद्योग-संलग्न प्रशिक्षण कार्यक्रमांचा विद्यार्थ्यांना मोठा लाभ होईल, असा विश्वास व्यक्त केला आहे.