आपला जिल्हा

एन एच ३५३ सी महामार्गाचे काम निकृष्ट ; सहा वर्षांपासून रखडलेल्या कामाची उच्चस्तरीय चौकशी करा; स्वामी समर्थ कन्स्ट्रक्शनच्या कामाची चौकशी करा, सामाजिक कार्यकर्ते संतोष ताटीकोंडावार यांची मागणी 

खडी-मुरूमच्या भरावापासून कामाच्या गुणवत्तेपर्यंत अनेक प्रश्न; कंत्राटदारांसह संबंधित अधिकाऱ्यांच्या भूमिकेची चौकशी करा

पूर्णसत्य न्यूज नेटवर्क गडचिरोली, दि. १९ नोव्हेंबर 

दक्षिण गडचिरोलीतील नागरिकांसाठी अत्यंत महत्त्वाचा असलेल्या राष्ट्रीय महामार्ग क्रमांक ३५३-सी  च्या बांधकामाचा प्रश्न पुन्हा ऐरणीवर आला आहे. तब्बल सहा वर्षांचा कालावधी उलटूनही महामार्गाचे काम पूर्णत्वास गेले नसल्याने नागरिकांमध्ये तीव्र नाराजी व्यक्त केली जात आहे. त्यातच महामार्गावरील कामाच्या दर्जाबाबत गंभीर प्रश्न उपस्थित करत स्वामी समर्थ कन्स्ट्रक्शन कंपनीशी संबंधित कामाची स्वतंत्र उच्चस्तरीय तांत्रिक व आर्थिक चौकशी करण्यात यावी, अशी मागणी सामाजिक कार्यकर्ते संतोष रामचंद्र ताटीकोंडावार यांनी केली आहे.

महामार्गाच्या बांधकामासाठी करण्यात आलेल्या खडी व मुरूम भरावाच्या दर्जाबाबत प्रश्नचिन्ह उपस्थित करण्यात आले आहे. उपलब्ध छायाचित्रात अवजड वाहनाची चाके खडी-मुरूमच्या भागात रुतल्याचे दिसत असल्याचा दावा करण्यात आला आहे. त्यामुळे संबंधित ठिकाणी प्रत्यक्ष स्थळपाहणी करून भरावाची जाडी, कॉम्पॅक्शन, वापरलेले साहित्य तसेच बांधकामाची गुणवत्ता यांची तांत्रिक तपासणी करण्याची मागणी करण्यात आली आहे.

सहा वर्षांचा कालावधी; तरीही महामार्गाचा प्रश्न कायम

एन एच ३५३ सी हा दक्षिण गडचिरोलीतील वाहतुकीच्या दृष्टीने महत्त्वाचा मार्ग आहे. मात्र, बांधकामाला सुरुवात होऊन अनेक वर्षे उलटूनही नागरिकांना धूळ, खड्डे, चिखल आणि वाहतुकीच्या अडचणींचा सामना करावा लागत असल्याचे ताटीकोंडावार यांनी म्हटले आहे. रुग्ण, गरोदर महिला, विद्यार्थी, शेतकरी, कामगार तसेच सर्वसामान्य प्रवाशांच्या सुरक्षिततेचा प्रश्न निर्माण होत असल्याने कामाचा दर्जा आणि कामाची गती याबाबत प्रशासनाने गंभीरपणे दखल घेण्याची गरज असल्याचे त्यांनी नमूद केले.

जनतेच्या पैशांचा विनियोग योग्य पद्धतीने होतोय का?

महामार्गासाठी शासनाचा मोठ्या प्रमाणावर निधी खर्च होत असताना प्रत्यक्षात दर्जेदार आणि सुरक्षित रस्ता उपलब्ध होत नसेल, तर त्याची जबाबदारी निश्चित होणे आवश्यक आहे. कामाच्या गुणवत्तेवर नियंत्रण ठेवण्याची जबाबदारी असलेल्या संबंधित अभियंते व अधिकाऱ्यांनी आतापर्यंत कोणत्या तपासण्या केल्या? निकृष्ट काम आढळल्यास देयके रोखण्यात आली का? दोषदायित्व निश्चित करण्यात आले का? असे सवाल ताटीकोंडावार यांनी उपस्थित केले आहेत. तसेच कंत्राटदार आणि संबंधित अधिकाऱ्यांमध्ये संभाव्य संगनमत झाले आहे का, याची निष्पक्ष चौकशी होणे आवश्यक असल्याचेही त्यांनी म्हटले आहे. मात्र, या संदर्भातील आरोपांची स्वतंत्र शासकीय चौकशी होऊन वस्तुस्थिती स्पष्ट होणे आवश्यक असल्याचे म्हटले आहे.

ताटीकोंडावार यांच्या प्रमुख मागण्या

 स्वामी समर्थ कन्स्ट्रक्शन कंपनीशी संबंधित महामार्गाच्या कामाची स्वतंत्र उच्चस्तरीय तांत्रिक व आर्थिक चौकशी करावी. खडी, मुरूम, GSB, भराव व कॉम्पॅक्शनची प्रयोगशाळेमार्फत गुणवत्ता तपासणी करावी. मोजमाप पुस्तिका, गुणवत्ता तपासणी अहवाल, देयके आणि मंजूर आराखड्यांची पडताळणी करावी. कंत्राटदारासोबत संबंधित अभियंते व अधिकाऱ्यांच्या भूमिकेची निष्पक्ष चौकशी करावी.  चौकशीत आर्थिक गैरव्यवहार, निकृष्ट बांधकाम किंवा संगनमत आढळल्यास नियमानुसार संबंधितांवर कठोर कारवाई करून शासनाच्या नुकसानीची वसुली करावी.

 

‘महामार्ग हा कंत्राटदारांच्या मनमानीचा विषय नाही’
जनतेच्या कराच्या पैशातून उभारला जाणारा राष्ट्रीय महामार्ग हा कंत्राटदार आणि अधिकाऱ्यांच्या मनमानीचा विषय होऊ शकत नाही. सहा वर्षांपासून नागरिक त्रस्त असताना प्रशासन गप्प का? महामार्गाच्या कामाचा दर्जा, खर्च झालेला निधी आणि जबाबदार व्यक्तींची भूमिका यांची निष्पक्ष चौकशी झालीच पाहिजे. जनहिताचा प्रश्न मार्गी न लागल्यास लोकशाही मार्गाने तीव्र आंदोलन छेडण्यात येईल.
— संतोष रामचंद्र ताटीकोंडावार
सामाजिक कार्यकर्ते, पदसिद्ध सदस्य, महाराष्ट्र शासन आरोग्य विभाग, जिल्हाध्यक्ष, जनकल्याण समाज उन्नती अन्याय भ्रष्टाचार निवारण समिती, गडचिरोली उपाध्यक्ष, महाराष्ट्र ट्रायबल ॲक्शन पीपल कमिटी, गडचिरोली
शेअर करा.

Related Articles

Leave a Reply

Your email address will not be published. Required fields are marked *

Back to top button
Don`t copy text!