गडचिरोली पोलीस आणि माओवाद्यांमध्ये झालेल्या चकमकीत चार माओवादी ठार

पूर्णसत्य न्यूज नेटवर्क गडचिरोली दि. २३ मे 

छत्तीसगड मधील चकमकीत भाकपा (माओवादी) नेता बसवराजू सह ३१ नक्षल्यांचा खात्मा होत नाही तोच, महाराष्ट्र छत्तीसगड सीमेवर नुकतेच स्थापन केलेल्या पोस्टे कवंडे हद्दीत पोलीस आणि माओवाद्यांत झालेल्या चकमकीत चार माओवाद्यांना ठार करण्यात यश आले आहे.

भामरागड तालुक्यातील कवंडे पोलीस स्टेशनच्या हद्दीत काही माओवादी दबा धरून बसले असल्याच्या विश्वासार्ह माहितीच्या आधारे, अति. पोलीस अधीक्षक एम. रमेश यांच्या नेतृत्वाखालील १२ सी ६० पथके (३०० कमांडो) आणि सीआरपीएफची एक तुकडी काल दुपारी कवंडे आणि नेलगुंडा येथून इंद्रावती नदीच्या काठावरील परिसरात मुसळधार पावसादरम्यान रवाना करण्यात आल्या होत्या. शुक्रवारी सकाळी सदर परिसरामध्ये पोलीस पथक घेराबंदी करून शोध मोहीम राबवत असताना, माओवाद्यांनी सी६० जवानांवर अंदाधुंद गोळीबार सुरू केला. ज्याला पोलीस पथकाने प्रभावी प्रत्युत्तर दिले. जवळजवळ दोन तास अधूनमधून गोळीबार सुरू होता. काही नक्षली परिस्थितीचा अंदाज घेत पळून जाण्यात यशस्वी झाले .

यानंतर पोलीस पथकाने परिसरात शोध मोहीम राबवल्यानंतर ४ जहाल माओवाद्यांचे मृतदेह, एक स्वयंचलित सेल्फ लोडिंग रायफल(SLR), दोन ३०३ रायफल आणि एक भरमार जप्त करण्यात आले आहेत. याशिवाय, घटना स्थळावरून वॉकी टॉकी, छावणी साहित्य, नक्षलवादी साहित्य इत्यादी जप्त करण्यात आले आहेत. उर्वरित माओवाद्यांच्या शोधासाठी परिसरात शोध मोहिम सुरू असल्याचे पोलिसांनी म्हटले आहे.