ए ए एनर्जी पॉवर प्लांट मधील स्फोटात अभियंत्याचा दुर्दैवी मृत्यू

पूर्णसत्य न्यूज नेटवर्क गडचिरोली, २७ ऑक्टोबर 

देसाईगंज वडसा येथील ए ए एनर्जी पॉवर प्लांट मध्ये आज पहाटे झालेल्या विस्फोटात एका अभियंत्याचा दुर्दैवी मृत्यू झाला असून एक मजूर गंभीर जखमी आहे. संजय सिंग (30) असे मृत्यू झालेल्या इंजिनियरचे नाव आहे तर गौरव केळझरकर (35) मजूर जुनी वडसा येथील रहिवासी आहे.

स्थानिक ए ए एनर्जी थर्मल पावर प्लांट मध्ये प्रोडक्शन लाईन वर पाहणी करण्याकरीता इंजिनियर सिंग आणि गौरव केळझरकर मजूर गेले होते. याच दरम्यान पहाटे साडेचार वाजता पाहणी करत असतांना अचानक स्टीम लाईनचा विस्फोट झाला. यात हे दोघे ही गंभीर जखमी झाले. इंजिनियर संजय सिंगला लगेच देसाईगंज येथील सामान्य रूग्णालयात उपचारासाठी आणले गेले असता पायाच्या हाडाला दुखापत असल्याने तेथे कुठलेही ऑर्थोपेडीक उपलब्ध नसल्याने खाजगी दवाखान्यात त्यांना नेण्यात आले. मात्र यावेळी खाजगी डॉक्टर उपलब्ध न झाल्याने 17 किमी दूर असलेल्या ब्रम्हपूरी येथील सावजी रूग्णालयात नेण्यात आले व तेथे उपचार सुरू असतांना संजय
सिंग यांना हृदयविकाराचा झटका आला आणि त्यातच त्यांचा दुर्दैवी मृत्यू झाला अशी माहिती सुत्रांकडून मिळाली आहे. गंभीर जखमी गौरव केळझरकरला ब्रम्हपूरी येथील खाजगी रूग्णालयात भरती करण्यात आले असून त्याच्यावर उपचार सुरू आहेत. स्फोटाचे कारण अद्याप स्पष्ट झालेले नाही.