गडचिरोलीत आज आंबेडकरी कार्यकर्ता महामेळावा व निर्धार सभा

पूर्णसत्य न्यूज नेटवर्क गडचिरोली दि.२५ फेब्रु.

बहुजन रिपब्लिकन सोशालिस्ट पक्षाच्या (बीआरएसपी) वतीने गडचिरोलीत २५ फेब्रुवारी रोजी दुपारी १२ वाजता गांधी चौकातील राजीव गांधी भवनात, आंबेडकरी कार्यकर्ता महामेळावा व निर्धार सभा आयोजित करण्यात आली आहे. यात येणाऱ्या निवडणुकांमध्ये आंबेडकरी जनतेची भूमिका निर्णायक राहणार आहे. मतांचे ध्रुवीकरण थांबवून एकत्र येण्याची हाक देण्याचा  निर्धार केला जाणार आहे.

या मेळाव्याच्या अध्यक्षस्थानी व मुख्य मार्गदर्शक म्हणून बीआरएसपीचे संस्थापक अध्यक्ष ॲड.सुरेश माने राहणार आहेत. महामेळाव्याचे उद्घाटन शेतकरी कामगार पक्षाच्या महिला नेत्या जयश्री जराते यांच्या हस्ते करण्यात येणार आहे. विशेष अतिथी म्हणून अखिल भारतीय रिपब्लिकन पक्षाचे केंद्रीय उपाध्यक्ष रोहिदास राऊत, शेतकरी कामगार पक्षाचे जिल्हा चिटणीस रामदास जराते, युवा नेते विनोद मडावी, मैत्री संघाच्या डॉ.उज्वला शेंडे, सत्यशोधक फाउंडेशनच्या ॲड.सोनाली मेश्राम, बहुजन रिपब्लिकन सोशालिस्ट पक्षाचे विदर्भ अध्यक्ष विशेष फुटाणे, विदर्भ महिला सहसंयोजिका डॉ.पूनम घोनमोडे, महासचिव भास्कर बांबोळे राहणार आहेत.

या मेळाव्याला उपस्थित राहण्याचे आवाहन बहुजन रिपब्लिकन सोशालिस्ट पक्षाचे जिल्हा प्रभारी राज बन्सोड, जिल्हाध्यक्ष मिलिंद बांबोळे, पुरुषोत्तम रामटेके, अरविंद वाळके, प्रितेश अंबादे, प्रतिक डांगे, सतीश दुर्गमवार, हेमंत रामटेके, विद्या कांबळे, सविता बांबोळे, तारका जांभूळकर, निलम दुधे, प्रतिमा करमे, रेखा कुंभारे, करुणा खोब्रागडे, राजेश्वरी कोटा, कमलेश रामटेके यांनी केले आहे