अल्पवयीन मुलीवरील अत्याचाराच्या दोन घटनांमध्ये एक आरोपी अटकेत तर एक फरार

पूर्णसत्य न्यूज नेटवर्क गडचिरोली, दि १३ ऑगस्ट 

गडचिरोली जिल्ह्यात दोन दिवसांपूर्वी अल्पवयीन मुलींवरील लैंगिक अत्याचाराच्या दोन धक्कादायक घटना समोर आल्याने खळबळ उडाली आहे. घोट परिसरातील एका गावात अल्पवयीन मुलीवर अत्याचार करून तिला गर्भवती केल्याचे ११ ऑगस्ट रोजी उघडकीस आले. या प्रकरणी घोट पोलीस मदत केंद्रात गुन्हा दाखल करून आरोपीला अटक करण्यात आली असून, गडचिरोली न्यायालयाने त्याला चार दिवसांची पोलीस कोठडी सुनावली आहे. दरम्यान, वडसा परिसरातही एका १५ वर्षीय मुलीवर अत्याचार झाल्याची घटना समोर आली असून, तिलाही उपचारासाठी गडचिरोली येथील जिल्हा महिला व बाल रुग्णालयात दाखल करण्यात आले आहे.

घोट परिसरातील पीडित अल्पवयीन मुलीच्या पोटात अचानक दुखू लागल्याने तिच्या आजीने तिला उपचारासाठी गडचिरोली येथील जिल्हा महिला व बाल रुग्णालयात दाखल केले. डॉक्टरांनी तिची वैद्यकीय तपासणी केली असता ती गर्भवती असल्याचे समोर आले.  रुग्णालयातील संबंधित यंत्रणेने मुलीला विश्वासात घेऊन चौकशी केली. त्यावेळी तिने एप्रिल महिन्यापासून आरोपी प्रविण अतुल झगडकर (वय २५) याच्याकडून अत्याचार होत असल्याची माहिती दिल्याचे पोलिसांनी सांगितले. मुलीने दिलेल्या माहितीनंतर घोट पोलीस मदत केंद्रात आरोपीविरुद्ध भारतीय न्याय संहितेतील कलम ६४(२)(आय), ६४(२)(एम) तसेच बालकांचे लैंगिक अपराधांपासून संरक्षण अधिनियम (पोक्सो) अंतर्गत कलम ४ आणि ६ नुसार गुन्हा दाखल करण्यात आला. पोलिसांनी आरोपीला अटक करून गडचिरोली न्यायालयात हजर केले. न्यायालयाने आरोपीला चार दिवसांची पोलीस कोठडी सुनावली आहे. या प्रकरणाचा पुढील तपास घोट पोलीस मदत केंद्राचे नव्याने रुजू झालेले सहाय्यक पोलीस निरीक्षक कल्पेश खारोडे करीत आहेत.

वडसा परिसरातही १५ वर्षीय मुलीवर अत्याचार

 वडसा परिसरातही एका १५ वर्षीय अल्पवयीन मुलीवर अत्याचार झाल्याची आणखी एक घटना समोर आली आहे. संबंधित मुलीला प्रथम वडसा येथे दाखल करण्यात आले. त्यानंतर मंगळवारी दुपारी सुमारे तीन वाजता तिला पुढील वैद्यकीय तपासणी व उपचारासाठी गडचिरोली येथील जिल्हा महिला व बाल रुग्णालयात हलविण्यात आले. रुग्णालयात आवश्यक वैद्यकीय तपासणी करण्यात आली असून, पीडित मुलीची प्रकृती सध्या स्थिर असल्याची माहिती रुग्णालय प्रशासनाकडून देण्यात आली आहे. या प्रकरणातील आवश्यक वैद्यकीय व कायदेशीर प्रक्रिया पूर्ण करण्यात आल्याचे रुग्णालयाच्या अधीक्षक डॉ. माधुरी किलनाके यांनी सांगितले. वडसा येथील घटनेबाबत पीडित मुलीच्या नातेवाईकांकडून गंभीर आरोप करण्यात आले आहेत. अत्याचाराच्या घटनेतील आरोपीचा अवैध व्यवसाय करणाऱ्या काही व्यक्तींशी संबंध असल्याची चर्चा परिसरात सुरू असून, या प्रभावामुळे प्रकरण दडपण्याचा प्रयत्न झाला का, असा सवाल उपस्थित केला जात आहे. तसेच संबंधित आरोपीकडून पोलिसांवर अप्रत्यक्ष दबाव आणण्याचा प्रयत्न झाला असावा, अशी शंकाही पीडितेच्या नातेवाईकांनी व्यक्त केली आहे. मात्र, या आरोपांची अधिकृत पुष्टी झालेली नाही. त्यामुळे या प्रकरणात पोलिसांचा तपास आणि पुढील कायदेशीर कारवाई महत्त्वाची ठरणार आहे.

एकाच कालावधीत अल्पवयीन मुलींवरील अत्याचाराच्या दोन घटना समोर आल्याने जिल्ह्यात चिंता व्यक्त केली जात आहे. विशेषतः घोट येथील घटनेत पीडित मुलगी गर्भवती झाल्याचे समोर आल्याने या प्रकरणाचे गांभीर्य अधिक वाढले आहे. अल्पवयीन मुलींवर अत्याचार करणाऱ्या आरोपींवर कठोरात कठोर कायदेशीर कारवाई करावी, तसेच पीडित मुलींना वैद्यकीय उपचारांसोबतच मानसिक आधार आणि आवश्यक कायदेशीर मदत मिळावी, अशी मागणी होत आहे.