खनिज उत्खननासाठी सर्वेक्षण, ग्रामसभांच्या एन ओ सी साठी एका कंपनीकडून साम दाम दंड भेदाचा वापर? वेलमागड येथे एन ओ सी संबंधित ग्रामसभांची बैठक सुरू ! अशा कृतीने ग्रामसभांच्या विश्वसनीयतेला तडा जाऊ शकतो?

पूर्णसत्य न्यूज नेटवर्क गडचिरोली दि. ७ ऑगस्ट

एटापल्ली तालुक्यातील वेलमागड येथे शुक्रवारी १२ वाजता पासून खनिज उत्खननासाठी सर्वेक्षण करण्याच्या प्रयत्नांचा एक भाग म्हणून ग्रामसभांच्या एन ओ सी साठी एक बैठक सुरू असल्याचे सांगितले जात आहे. या बैठकीत एक इच्छुक कंपनी साम दाम दंड भेद रणनीती वापरुन ग्रामसभांच्या एन ओ सी मिळवण्याचा प्रयत्न करीत असल्याचे समजते. कंपनीच्या या अमिषाला काही ग्रामसभांचे लोक बळी पडले असल्याचे समोर आले असल्याने ग्रामसभांच्या विश्वसनीयतेवर प्रश्नचिन्ह निर्माण होण्याची संभावना व्यक्त होत आहे. त्यामुळे या बैठकीत वेलमागड भागातील ग्रामसभा सदर कंपनीला एन ओ सी देण्यासाठी सकारात्मक भूमिका घेतात काय? याकडे गडचिरोली जिल्हावासीयांचे लक्ष लागले आहे.

उल्लेखनीय आहे की गडचिरोली जिल्ह्यात लोहखनिज उत्खननाचा मोठा घाट घातला जात असून यासाठी अनेक कंपन्या आपल्या विस्तारित प्रकल्पांसाठी प्रयत्नशील आहेत. यापूर्वीही एका कंपनीने प्रशासकिय स्तरावर बैठक बोलावून ग्रामसभांची एन ओ सी मिळवण्याचा प्रयत्न केला होता.
शुक्रवारच्या बैठकीसाठी कंपनीने एटापल्ली तालुक्यातील काही पत्रकारांना मॅनेज करुन बैठकीसाठी एटापल्ली वरुन कुणीही पत्रकार जाणार नसल्याची खबरदारी घेतली असल्याचे समजते. बैठकीत संबंधित कंपनीसाठी होऊ घातलेल्या सर्वेक्षणासाठी विविध ग्रामसभा एन ओ सी देणार काय असा प्रश्न उपस्थित केला जात आहे. विशेष म्हणजे वेलमागड परिसरातील ग्रामसभांनी सर्वेक्षणासाठी एन ओ सी देण्यास ठाम नकार दिला आहे. सदर बैठकीचे इतिवृत्त सायंकाळपर्यंत समोर येईल. यातून ग्रामसभांची भूमिका स्पष्ट होईल. या पार्श्वभूमीवर शुक्रवारच्या बैठकीत काय होते याकडे लक्ष वेधले गेले आहे.