प्रकल्पग्रस्ताचे खोटे प्रमाणपत्र जोडून पोलिसात भरती झालेले युवक स्थानिक गुन्हे शाखेकडून जेरबंद

पूर्णसत्य न्यूज नेटवर्क गडचिरोली दि. २३ एप्रिल 

गडचिरोली जिल्ह्यात नुकत्याच झालेल्या पोलीस भरती मध्ये प्रकल्पग्रस्तांच्या नावावर खोटे प्रमाणपत्र जोडून पोलिसात भरती झालेल्या पाच ते सहा युवकांना स्थानिक गुन्हे शाखेने शनिवारी जेरबंद केले असून स्थानिक गुन्हे शाखेच्या फिर्यादीवरून गडचिरोली पोलिसांनी अटक केली आहे. यातील आणखी एक आरोपी फरार असून पोलीसांचे एक पथक त्याला शोधण्यासाठी रवाना झाले आहे.

प्राप्त माहितीनुसार एप्रिल महिन्याच्या पहिल्या आठवड्यात गडचिरोली पोलीस भरती प्रक्रिया पूर्ण झाली. त्यात विविध आरक्षणानुसार पात्र उमेदवारांची निवड करण्यात आली. यात सर्वसाधारण, एससी, एसटी, महिला, प्रकल्पग्रस्त, खेळाडू अशा कोट्यातून उमेदवार निवडले गेले. निवड झालेल्या उमेदवारांच्या मुळ कागदपत्रांच्या अंतिम छाननीच्या वेळी एका निनावी तक्रारदाराच्या तक्रारी वरुन पडताळणी केली असता प्रकल्पग्रस्तांच्या आरक्षणातील उमेदवारांनी बीड आणि नांदेड जिल्ह्यातील प्रकल्पग्रस्त असल्याचे खोटे दाखले जोडल्याचे निष्पन्न झाले. जिल्हा पोलीस अधीक्षकांनी याची गंभीर दखल घेऊन स्थानिक गुन्हे शाखेच्या वतीने तपास सुरू केला. आरोपींना याची भनक लागताच ते दोन दिवसांपूर्वी फरार झाले. मात्र एलसीबीने शनिवारी यातील पाच ते सहा युवकांना मोठ्या शिताफीने ताब्यात घेतले. यातील एक आरोपी अजूनही फरार आहे. यामुळे पोलीस प्रशासनात एकच खळबळ माजली आहे.
जिल्हा पोलीस अधीक्षकांनी घटनेला दुजोरा दिला असला तरी विस्तृत माहिती व आरोपींची नावे रविवारी प्रेस नोट काढून देणार असल्याचे म्हटले आहे.